2023 թվականի դեկտեմբերի 5-ից 7-ը ք. Մոսկվայում տեղի ունեցավ Եվրասիական արտոնագրային կազմակերպության Վարչական խորհրդի 43-րդ (30-րդ հերթական) նիստը, որին մասնակցել է Վարչական խորհրդում Հայաստանի Հանրապետության լիազոր ներկայացուցիչ՝ ՀՀ էկոնոմիկայի նախարարության մտավոր սեփականության գրասենյակի ղեկավար Ք. Համբարյանը:
Նիստի ընթացքում ընդունվել են հետևյալ հիմնական որոշումները.
1. Որոշում է կայացվել 2024 թվականի հունվարի 1-ից ճշգրտել եվրասիական արտոնագրերի տրամադրման հայտերի առնչությամբ կատարվող իրավական նշանակալի և այլ գործողությունների համար տուրքերի չափերը:
2. Հաստատվել են Արտոնագրային հրահանգում կատարվող փոփոխությունները և լրացումները, որոնք ուժի մեջ կմտնեն 2024 թվականի հունվարի 1-ից.
սահմանվել է եվրասիական հայտ ներկայացնելիս գյուտի հավակնության սահմանման ներկայացման վերջնաժամկետ,
հայտատուին հնարավորություն է ընձեռվել շարունակել եվրասիական հայտով գործավարությունը եվրասիական հայտը ներկայացնելիս գյուտի հավակնության սահմանման ժամանակին չներկայացնելու դեպքում, ներառյալ՝ զատված հայտի փոփոխված հավակնության սահմանումը,
գյուտերի և արդյունաբերական նմուշների եվրասիական արտոնագրերի տրամադրման դեմ առարկությունների ներկայացման ժամկետը վարչական չեղարկման ընթացակարգով 9 ամսից դարձել է 3 տարի,
հստակեցվել են արդյունաբերական նմուշների եվրասիական հայտերի փորձաքննությանը վերաբերող դրույթները,
ներդրվել է վեճը հաշտարարության ընթացակարգով լուծելու հնարավորություն այն դեպքում, երբ արդյունաբերական նմուշը նույնական է կամ շփոթելու աստիճան նման է ավելի վաղ առաջնություն ունեցող ապրանքային նշաններին:
3. Հաստատվել է Եվրասիական դեղագործական գրանցամատյանի կանոնակարգը:
4. Ինչպես նաև Եվրասիական արտոնագրային կազմակերպության անդամ պետությունների գերատեսչությունները սահմանել են ՏՏ համագործակցության առաջնահերթ ոլորտները, մասնավորապես՝ տեղեկատվության փոխանակում արդյունաբերական սեփականության գրանցամատյաններից, այդ թվում՝ CISPATENT նախագծի զարգացման շրջանակներում, արհեստական
​​
ինտելեկտի տեխնոլոգիաների օգտագործումը մտավոր սեփականության ոլորտում, էլեկտրոնային փոխգործակցության բարելավում եվրասիական արտոնագրային ընթացակարգում և այլն։