2025 թ. մայիսի 12-23-ը Ռուսաստանի Դաշնության Մոսկվա քաղաքում տեղի ունեցավ «Գյուտերի արտոնագրման Եվրասիական համակարգ. մեխանիկայի և ֆիզիկայի բնագավառում գյուտերի փորձաքննության գործնական հարցեր: Համակարգչային տեխնոլոգիաների և արհեստական բանականության ոլորտում լուծումների արտոնագրաունակությունը» խորագրով Եվրասիական արտոնագրային կոնվենցիային (ԵԱԿ) միացած պետությունների արտոնագրային գործակալությունների փորձագետ-մասնագետների ամենամյա վերապատրաստման դասընթացը, որին մասնակցեցին ՀՀ Էկոնոմիկայի նախարարության մտավոր սեփականության գրասենյակի աշխատակիցները:

Գործնական ուղղվածությամբ ուսումնական դասընթացի ընթացքում քննարկվել են «Գյուտերի արտոնագրման Եվրասիական համակարգ», «Գյուտերի փորձաքննության գործնական հարցեր մեխանիկայի և ֆիզիկայի բնագավառում» և «Արտոնագրաունակության որոշումը համակարգչային տեխնոլոգիաների և արհեստական բանականության բնագավառում» թեմաները:

Այս թեմաների քննարկման շրջանակներում մտավոր սեփականության գրասենյակի ներկայացուցիչները հանդես են եկել «Գյուտերի փորձաքննությունը Հայաստանում, գործնական օրինակներ» վերնագրով ելույթով  (սահիկաշարով), ինչպես նաև մասնակցել են աշխատանքային փորձի փոխանակմանը վերաբերող կլոր-սեղան քննարկմանը: Առաջարկություններ արվեցին մտավոր սեփականությանը վերաբերող լավագույն փորձն ընդլայնել և ներդնել եվրասիական տարածաշրջանի ազգային արտոնագրային գրասենյակներում, մեծացնել շփումները գործնական շրջանակներում՝ գյուտերի փորձաքննության բնագավառում։