2025 թվականի մայիսի 29-ին Ղազախստանի Հանրապետության մայրաքաղաքում «Աստանա» միջազգային ֆորումի հարթակում տեղի ունեցավ «Մտավոր սեփականությունը արհեստական բանականության դարաշրջանում» պանելային քննարկումը:

Քննարկմանը մասնակցում էին Հայաստանի, Ֆրանսիայի, Չինաստանի, Մալայզիայի Հյուսիսային Մակեդոնիայի և մի շարք այլ երկրների պաշտոնական պատվիրակությունները, ինչպես նաև միջազգային կազմակերպությունների ներկայացուցիչներ՝ Մտավոր սեփականության համաշխարհային կազմակերպության (ՄՍՀԿ) նախագահը, Եվրասիական արտոնագրային կազմակերպության (ԵԱԱԿ) նախագահը և Եվրասիական տնտեսական հանձնաժողովի տնտեսության և ֆինանսական քաղաքականության նախարարը։

Պանելային քննարկման ընթացքում տեղի ունեցավ մտքերի փոխանակում թվային տրանսֆորմացիայի պայմաններում՝ մտավոր սեփականության ապագայի ռազմավարական հարցերի, արհեստական բանականության կողմից ստեղծված ստեղծագործությունների հեղինակության և մի շարք այլ հարցերի շուրջ: