Հեղինակային իրավունքը հեղինակի բացառիկ անձնական ոչ գույքային և բացառիկ գույքային իրավունքներն են իր ստեղծագործության նկատմամբ։
Հեղինակային իրավունքը տարածվում է գրական և գեղարվեստական ստեղծագործությունների լայն շրջանակի վրա, ինչպիսիք են՝ գրականության, երաժշտության, գեղանկարչության, պարարվեստի, քանդակագործության, ճարտարապետության, տեսալսողական, գիտական ստեղծագործությունները, ինչպես նաև համակարգչային ծրագրերը, տվյալների բազաները և այլն:
Հեղինակի անձնական ոչ գույքային իրավունքներն անօտարելի և անփոխանցելի են, հեղինակի գույքային իրավունքներն ապահովում են հեղինակի նյութական շահերը` տալով հեղինակին բացառիկ իրավունք թույլատրելու կամ արգելելու իր ստեղծագործության կամ դրա օրինակների օգտագործումը։
Ստեղծագործության օգտագործում էհամարվում ստեղծագործության վերարտադրումը, տարածումը, բնօրինակը կամ օրինակները վարձույթով տալը, փոխատվությունը, թարգմանությունը, հաղորդումը հանրությանը, հրապարակային կատարումը, հրապարակային ցուցադրումը, հեռարձակումը, վերամշակումը, վերադաշնակումը, նկարազարդումը, հարմարեցումը և այլ ձևերով վերափոխումը:
Հեղինակն իրավունք ունի ստեղծագործության օգտագործման յուրաքանչյուր ձևի դիմաց ստանալու հեղինակային վարձատրություն։ Հեղինակային վարձատրության դրույքաչափերը սահմանված են ՀՀ կառավարության որոշմամբ:
Երկրների մեծամասնությունում և Բեռնի կոնվենցիայի համաձայն` հեղինակային իրավունքն առաջանում է ստեղծագործության ստեղծման փաստով և գործող օրենքով դեռևս ենթակա չէ գրանցման:
Գույքային իրավունքները կոլեկտիվ հիմունքներով կառավարող կազմակերպությունների վերաբերյալ
Հեղինակային և հարակից իրավունքների կոլեկտիվ կառավարման կազմակերպությունները ոչ առևտրային կազմակերպություններ են, որոնք հիմնադրվում են անմիջապես հեղինակների, կատարողների, հնչյունագրեր արտադրողների և հեղինակային և հարակից իրավունքների այլ իրավատերերի կողմից: Գույքային իրավունքների կոլեկտիվ կառավարումը մի ընթացակարգ է, որը գործում է աշխարհի զարգացած երկրների մեծ մասում և այն դեպքերում, երբ հեղինակների, կատարողների, հնչյունագիր արտադրողների եւ նրանց իրավահաջորդների գույքային իրավունքների կառավարումը անհատական հիմունքներով դժվար է կամ որոշ դեպքերում նույնիսկ անհնարին, ապա այստեղ օգնության կարող են գալ գույքային իրավունքները կոլեկտիվ հիմունքներով կառավարող կազմակերպությունները: Փաստացի կոլեկտիվ կառավարման կազմակերպությունները հանդիսանում են միջնորդ իրավատերերի և օգտագործողների միջև: Գույքային իրավունքները կոլեկտիվ հիմունքներով կառավարող կազմակերպությունները իրականացնում են հետևյալ գործառույթները՝կազմակերպությունները ստանձնում են հեղինակների և նրանց իրավահաջորդների շահերը ներկայացնելու լիազորությունները և կնքում են համապատասխան թույլտվության պայմանագրեր օգտագործողների հետ՝ կողմերի հետ համաձայնեցնելով օգտագործման և վարձատրության պայմանները, ինչպես նաև գանձում են վճարներ օգտագործողներից և բաշխում հեղինակային և հարակից իրավունքների իրավատերերի միջև:
