ՀՀ էկոնոմիկայի նախարարության մտավոր սեփականության գրասենյակի (ՄՍԳ) և Եվրոպական միության մտավոր սեփականության գրասենյակի (EUIPO) համագործակցության շրջանակում, ԵՄ կողմից ֆինանսավորվող «EU4IP» ծրագրի աջակցությամբ, ՀՀ գլխավոր դատախազության ներկայացուցիչները մասնակցել են մտավոր սեփականության ոլորտի հանցագործությունների քննության և քրեական հետապնդման հարցերին նվիրված միջազգային աշխատաժողովին, որը տեղի է ունեցել 2026 թվականի սեպտեմբերի 10–11-ը Իսպանիայի Ալիկանտե քաղաքում՝ EUIPO-ի կենտրոնակայանում։

Աշխատաժողովը կազմակերպվել էր EUIPO-ի և Eurojust-ի կողմից՝ Մտավոր սեփականության ոլորտի եվրոպական դատախազների ցանցի (EIPPN) 13-րդ աշխատաժողովին զուգահեռ։ Միջոցառմանը մասնակցել են ԵՄ անդամ պետությունների, ինչպես նաև Ուկրաինայի, Մոլդովայի և ԵՄ գործընկեր երկրների դատախազներ ու ոլորտի մասնագետներ։

Քննարկվել են մտավոր սեփականության ոլորտի հանցագործությունների քննության և քրեական հետապնդման արդի մարտահրավերները, օրենսդրական և դատական փորձը, առցանց խարդախության դեմ պայքարի և միջազգային համագործակցության հարցերը։

Միջոցառումը հնարավորություն է տվել ՀՀ գլխավոր դատախազության ներկայացուցիչներին ծանոթանալ եվրոպական լավագույն փորձին, ընդլայնել մասնագիտական կապերը և խթանել միջազգային համագործակցությունը մտավոր սեփականության իրավունքների պաշտպանության ոլորտում։