1. Ի՞նչ է անհրաժեշտ ապրանքային նշանի գրանցման գործողության ժամկետը երկարաձգելու համար

Անհրաժեշտ է օգտվել Մտավոր սեփականության գրասենյակի (այսուհետ՝ Գրասենյակ) կայքից՝ www.aipo.am: Ձևաթղթեր բաժնում առկա է ապրանքային  նշանի գրանցման գործողության ժամկետը երկարաձգելու մասին դիմումի ձևը: Անհրաժեշտ է ներբեռնել և լրացնել դիմումը: Լրացնելու համար կարելի է օգտվել կայքի ենթաօրենսդրական ակտեր բաժնի «Ապրանքային նշանների գրանցման գործողության ժամկետի երկարաձգման մասին դիմումների ձևակերպման և քննարկման» կարգից: Կցել պետական տուրքի վճարման անդորրագիրը: Կարող եք կցել նաև վկայագիրը, որին կից գրառում է կատարվում:

2. Որքա՞ն է պետական տուրքը

Մեկ դասի համար գրանցված ապրանքային  նշանի համար պետական տուրքը կազմում է 120000 դրամ, իսկ մեկից ավել դասերի համար գրանցված լինելու դեպքում յուրաքանչյուր լրացուցիչ դասի համար վճարը կազմում է 10000 դրամ:  «Պետական տուրքի մասին» ՀՀ օրենքի 28-րդ հոդվածի 2-րդ պարբերության համաձայն ֆիզիկական անձինք և մինչև 25 աշխատող ունեցող իրավաբանական անձինք «ժը» ենթակետով սահմանված տուրքը վճարում են 75% զեղչով, իսկ 25-ից 100 աշխատող ունեցող իրավաբանական անձինք 50% զեղչով:

Պետք է կատարել վճարում «Պետական տուրքի մասին» Հայաստանի Հանրապետության օրենքի  18-րդ հոդվածի 4-րդ կետի «ժը» ենթակետով սահմանված չափով և պետական տուրքի վճարումը հաստատող փաստաթուղթը կցել դիմումին: Տեղեկացնում ենք նաև, որ նշանի գրանցման գործողությունը երկարաձգելու համար պետական տուրքը կարող է վճարվել նաև վերը նշված ժամկետի ավարտից հետո վեց ամսվա ընթացքում։ Այս դեպքում, «Պետական տուրքի մասին» Հայաստանի Հանրապետության օրենքի  33-րդ հոդվածի 8-րդ մասի համաձայն դրա չափն ավելացվում է 20 տոկոսով։ 

Համապատասխան գումարը պետք է վճարել ՀՀ պետական բյուջե՝ 900005016200 հաշվեհամարին:

3. Պարտադի՞ր է արդյոք ներկայացնել ապրանքային նշանի վկայագիրը

Ցանկության դեպքում կարող է ներկայացվել նաև ապրանքային նշանի վկայագրի բնօրինակը: Եթե վկայագիրը չի ներկայացվում, ապա ապրանքային նշանի իրավատիրոջը կամ նրա լիազորած անձին հանձնվում կամ փոստով ուղարկվում է պետական գրանցամատյանից համապատասխան քաղվածք։

4. Ի՞նչ ժամկետում է կատարվում ապրանքային նշանի գործողության ժամկետի երկարաձգման գործընթացը

Գրասենյակը դիմումը քննարկում է փաստաթղթերն ստանալու օրվանից 10 աշխատանքային օրվա ընթացքում։ Դիմումի քննարկման ընթացքում ստուգվում է ներկայացված նյութերի համապատասխանությունը պետական գրանցամատյանի տվյալներին:

Եթե քննարկման արդյունքում պարզվում է, որ ներկայացված նյութերը չեն համապատասխանում սահմանված պահանջներին, նշանի իրավատիրոջը երեք աշխատանքային օրվա ընթացքում ուղարկվում է հարցում՝ այն ստանալու օրվանից երկամսյա ժամկետում ճշգրտված կամ բացակայող նյութերը և (կամ) «Պետական տուրքի մասին» Հայաստանի Հանրապետության օրենքի  33-րդ հոդվածի 2-րդ մասի համաձայն պակաս վճարված պետական տուրքը վճարելու և վճարման անդորրագիրը ներկայացնելու վերաբերյալ առաջարկությամբ։  

Երկու ամսվա ընթացքում ճշգրտված կամ բացակայող նյութերը չներկայացնելու  դեպքում Գրասենյակը ընդունում է որոշում դիմումը մերժելու մասին:

5. Ինչպե՞ս պետք է ներկայացնել դիմումը և դրա հետ կապված փաստաթղթերը

Դիմումը, վճարման անդորրագիրը (զեղչով վճարելու դեպքում նաև աշխատողների թվի մասին տեղեկանքը), կարող է ներկայացվել Գրասենյակի կայքի էլեկտրոնային համակարգի միջոցով (եթե ունեք էլեկտրոնային ստորագրություն) կամ փոստով:

1. Ո՞րն է տարեկան տուրքերի վճարման կարգը

Արտոնագիրը հաջորդ տարում ուժի մեջ պահելու համար, անհրաժեշտ է համապատասխան գումարը վճարել 900005016200 հաշվեհամարին՝ ՀՀ պետական բյուջե, և վճարված տուրքի անդորրագիրը ներկայացնել Գրասենյակ:

2. Ինչպե՞ս կարելի է արտոնագրի գործողության ժամկետը երկարաձգել սահմանված ժամկետի ավարտից հետո

Գյուտի արտոնագրով վերապահված, ինչպես նաև արդյունաբերական դիզայնի գրանցումից բխող իրավունքների պահպանության ժամկետները կարող են  երկարաձգվել նաև սահմանված ժամկետի ավարտից հետո՝ վեց ամսվա ընթացքում: Այս դեպքում պետական տուրքի չափն ավելանում է 50 տոկոսով։

3. Կարելի՞ է արդյոք վերականգնել դադարեցված արտոնագրի գործողությունը. կարգն ու ժամկետները

Դադարեցված գյուտի կամ արդյունաբերական դիզայնի նկատմամբ իրավունքները կարող են վերականգնվել իրավատիրոջ դիմումի հիման վրա։ Դիմումն անհրաժեշտ է պետական լիազոր մարմին ներկայացնել սահմանված ժամկետը լրանալուց հետո` երեք տարվա ընթացքում, բայց ոչ ուշ, քան մինչև արտոնագրի կամ արդյունաբերական դիզայնի գրանցման արտոնագրի գործողության սահմանված ժամկետը լրանալը։

1. Ի՞նչ փաստաթղթեր են անհրաժեշտ ներկայացնել ապրանքային նշանի նկատմամբ իրավունքի փոխանցումը գրանցելու համար

Անհրաժեշտ տեղեկությունները գտնվում են Գրասենյակի՝ www.aipo.am  կայքում: Ձևաթղթեր բաժնում առկա է ապրանքային նշանի նկատմամբ իրավունքի փոխանցումը գրանցելու մասին դիմումի ձևը: Անհրաժեշտ է ներբեռնել doc տարբերակով  և լրացնել դիմումը: Դիմումին պետք է կցել օրենքով սահմանված պետական տուրքի վճարման անդորրագիրը: Կարող եք կցել նաև վկայագրի բնօրինակը, որին կավելացվի ներդիր, կկատարվի համապատասխան գրառում և հետ կվերադարձվի:

2. Կա՞ արդյոք պայմանագրի օրինակելի ձև

Ոչ: Դուք կարող եք օգտվել ՀՀ քաղաքացիական օրենսգրքի պայմանագրերին վերաբերող դրույթներից և պայմանագիրը կազմել կողմերի պահանջներից ելնելով:

3. Ի՞նչ դրույթներ պետք է պարունակի պայմանագիրը

Գրասենյակի կողմից սահմանված հատուկ պահանջներ չկան: Սակայն պայմանագրում պետք է հստակ նշված լինի ո՞ր օբյեկտի (վկայագրի համարը) և ո՞ր ապրանքների և (կամ) ծառայությունների նկատմամբ է իրավունքները փոխանցվում:

4. Որքա՞ն է կազմում մեկ ապրանքային նշանի նկատմամբ իրավունքը փոխանցելու համար պետական տուրքի չափը

«Պետական տուրքի մասին» ՀՀ օրենքի 18-րդ հոդվածի 4-րդ մասի «ժզ» ենթակետի համաձայն յուրաքանչյուր ապրանքային նշանի նկատմամբ իրավունքի փոխանցումը գրանցելու համար պետք է վճարել 60000-ական դրամ: «Պետական տուրքի մասին» ՀՀ օրենքի 28-րդ հոդվածի համաձայն ֆիզիկական անձինք և մինչև 25 աշխատող ունեցող իրավաբանական անձինք սահմանված տուրքը վճարում են 75% զեղչով, իսկ 25-ից 100 աշխատող ունեցող իրավաբանական անձինք՝ 50% զեղչով: Զեղչից օգտվելու դեպքում դիմումին կցվում է նաև տեղեկանք աշխատողների թվաքանակի վերաբերյալ՝ պետական տուրքը վճարելու օրվա դրությամբ:

5. Կարելի՞ է փաստաթղթերը ուղարկել էլեկտրոնային համակարգի կամ էլեկտրոնային փոստի միջոցով

Ոչ: Քանի որ դիմումին կից պետք է ներկայացվի իրավունքների փոխանցումը հավաստող պայմանագրի բնօրինակը:

6. Ի՞նչ փաստաթղթեր պետք է ներկայացնել դիմումին կից, եթե դիմումն ընկերության տնօրենի փոխարեն ներկայացնում է լիազորված անձը

Պետք է ներկայացնել տնօրենի կողմից տրված լիազորագիր:

7. Ի՞նչ ժամկետում է կատարվում ապրանքային նշանի նկատմամբ իրավունքի փոխանցման գրանցումը

Գրասենյակը դիմումը քննարկում է փաստաթղթերն ստանալու օրվանից 7 աշխատանքային օրվա ընթացքում։ Դիմումի քննարկման ընթացքում ստուգվում է ներկայացված նյութերի համապատասխանությունը օրենքով սահմանված պահանջներին:
Եթե քննարկման արդյունքում պարզվում է, որ ներկայացված նյութերը չեն համապատասխանում սահմանված պահանջներին, ապա նշանի իրավատիրոջը երեք աշխատանքային օրվա ընթացքում ուղարկվում է հարցում՝ այն ստանալու օրվանից երկամսյա ժամկետում ճշգրտված կամ բացակայող նյութերը և (կամ) «Պետական տուրքի մասին» Հայաստանի Հանրապետության օրենքի 33-րդ հոդվածի 2-րդ մասի համաձայն պակաս վճարված պետական տուրքը վճարելու և վճարման անդորրագիրը ներկայացնելու վերաբերյալ առաջարկությամբ։
Երկու ամսվա ընթացքում ճշգրտված կամ բացակայող նյութերը չներկայացնելու  դեպքում Գրասենյակը ընդունում է որոշում՝ դիմումը մերժելու մասին:

1. Ինչպե՞ս պետք է կատարել գրանցամատյանում իրավատիրոջ անվան փոփոխությունը և ի՞նչ փաստաթղթեր են անհրաժեշտ

Անհրաժեշտ տեղեկությունները գտնվում են Գրասենյակի՝ www.aipo.am  կայքում: Ձևաթղթեր բաժնում առկա է պետական գրանցամատյանում փոփոխություն կատարելու մասին դիմումի ձևը: Անհրաժեշտ է ներբեռնել doc տարբերակով  և լրացնել դիմումը: Դիմումին պետք է կցել օրենքով սահմանված պետական տուրքի վճարման անդորրագիրը և անվանափոխությունը հաստատող փաստաթուղթը: Կարող եք կցել նաև վկայագրի բնօրինակը, որին կավելացվի ներդիր, կկատարվի համապատասխան գրառում և հետ կվերադարձվի:

2. Ինչպե՞ս պետք է կատարել գրանցամատյանում իրավատիրոջ հասցեի կամ նամակագրության հասցեի փոփոխությունը և ի՞նչ փաստաթղթեր են անհրաժեշտ

Անհրաժեշտ տեղեկությունները գտնվում են Գրասենյակի՝ www.aipo.am  կայքում: Ձևաթղթեր բաժնում առկա է պետական գրանցամատյանում փոփոխություն կատարելու մասին դիմումի ձևը: Անհրաժեշտ է ներբեռնել doc տարբերակով  և լրացնել դիմումը: Դիմումին պետք է կցել օրենքով սահմանված պետական տուրքի վճարման անդորրագիրը:

3. Որքա՞ն պետք է վճարել գրանցամատյանում փոփոխություն կատարելու համար

Պետական գրանցամատյանում մեկ փոփոխություն կատարելու համար պետական տուրքը կազմում է 20000 դրամ:  «Պետական տուրքի մասին» ՀՀ օրենքի 28-րդ հոդվածի համաձայն ֆիզիկական անձինք և մինչև 25 աշխատող ունեցող իրավաբանական անձինք սահմանված տուրքը վճարում են 75% զեղչով, իսկ 25-ից 100 աշխատող ունեցող իրավաբանական անձինք՝ 50% զեղչով: Զեղչից օգտվելու դեպքում դիմումին կցվում է նաև տեղեկանք աշխատողների թվաքանակի վերաբերյալ՝ պետական տուրքը վճարելու օրվա դրությամբ:

4. Կարելի՞ է արդյոք փոփոխություն կատարել գրանցված ապրանքային նշանի պատկերում

Այո, փոփոխություն(ներ)  կարելի է կատարել, եթե այդ փոփոխությունը (փոփոխությունները) չեն ազդում ապրանքային նշանի տարբերակիչ հատկության վրա, այսինքն՝ ոչ էական փոփոխություն(ներ) է (են):

5. Ինչպե՞ս կարող եմ ստանալ ապրանքային նշանի վկայագրի կրկնակը

Ապրանքային նշանի գրանցման վկայագրի կորստի կամ օգտագործման համար ոչ պիտանի դառնալու դեպքում դրա կրկնակն ստանալու համար ապրանքային նշանի իրավատերը կարող է դիմում ներկայացնել Գրասենյակի պետի անունով (դիմումի ձև սահմանված չէ)` կցելով օրենքով սահմանված պետական տուրքի վճարման անդորրագիրը։ Պետական լիազոր մարմինը վկայագրի կրկնակը տալիս է հինգ աշխատանքային օրվա ընթացքում: Վկայագրի կրկնակը ստանալու համար պետական տուրքը կազմում է 30000 դրամ:  «Պետական տուրքի մասին» ՀՀ օրենքի 28-րդ հոդվածի համաձայն ֆիզիկական անձինք և մինչև 25 աշխատող ունեցող իրավաբանական անձինք սահմանված տուրքը վճարում են 75% զեղչով, իսկ 25-ից 100 աշխատող ունեցող իրավաբանական անձինք՝ 50% զեղչով: Զեղչից օգտվելու դեպքում դիմումին կցվում է նաև տեղեկանք աշխատողների թվաքանակի վերաբերյալ՝ պետական տուրքը վճարելու օրվա դրությամբ:

6. Ինչպե՞ս կարող եմ պետական գրանցամատյանից քաղվածք ստանալ

Ցանկացած անձի դիմումի համաձայն` օրենքով սահմանված պետական տուրքի վճարման պայմանով, Գրասենյակը քաղվածքներ է տրամադրում պետական գրանցամատյանից, այդ թվում՝ ապրանքային նշանների գրանցման միջազգային հիմնապաշարից (անգլերեն լեզվով): Գրանցված մեկ ապրանքային նշանի վերաբերյալ քաղվածք տրամադրելու համար պետական տուրքը 2000 դրամ է: Քաղվածք տրամադրելու համար անհրաժեշտ տեղեկությունները գտնվում են Գրասենյակի՝ www.aipo.am  կայքում: Ձևաթղթեր բաժնում առկա է պետական գրանցամատյանից քաղվածք տրամադրելու մասին դիմումի ձևը: